Friday, January 6, 2017

වැම්පයරෙකුට පෙම් බැඳ..

එඩ්වර්ඩ් මගේ ලෝකයට ආවේ අහම්බයකිනි. ට්වයිලයිට් චිත්‍රපටය ලංකාවට පැමිණියේ වැහි දැරිවිට අවුරුදු දාහතරක් පහළවක් කාලයේය. ඒ කාලයේ නිකම් විනෝදයට මෙන් චිත්‍රපටය නැරඹුවත් චිත්‍රපටයේ එඩ්වර්ඩ් ගැන මගේ හිතේ ඒ හැටි බරපතළ කුළුඳුල් ප්‍රේමයක් උපන්නේ නැත. 😉 ඒත් එඩ්වර්ඩ් සහ බෙලා දම් පැහැති පුංචි මල් ඇතිරුණු තණ පිට්ටනියක දිගා වී උනුන් දිහා බලා ඉන්නා දර්ශනයට මම ඉතා ආසා කළෙමි. ඉනික්බිති පැමිණි චිත්‍රපට පෙළ ද නැරඹුවේ කම්මැලිකමට, වෙන කරන්නට දෙයක් නැතුව කාලය බිබී උන් වස්සාන හවස් වරුවල ය. 

එඩ්වර්ඩ් ගැන වෙසෙසි ආදරයක් නූනත් ඒ චිත්‍රපට පෙළ මම ආසාවෙන් නැරඹූ සිනමාපට පෙළකි. එහෙත් එය පොතකින් නිමැවූ සිනමාපටයක් වග මා දැන උන්නේ නැත. ඒ වග කනට වැටුණේ උසස්පෙළ කරන සමයේදී ය. කරුමයකට වගේ මගේ එක් මිතුරියක් මට එහා ගිය පොත් කාවෙකි. සාමාන්‍යයෙන් කාලච්ඡේද සියල්ල ම වාගේ ඉගැන්වීම් කටයුතු කෙරුණු බැවින් අපට කතාබහ කරන්නට වෙලාව සොයාගත හැකි වූයේ අඩුවෙනි. එහෙයින් විවේකය සඳහා ලැබෙන විනාඩි පහළව අපේ යාලු මිතුරු හවුලේ උන් කෙල්ලන් අට දෙනා විසින් වැය කරන ලද්දේ කතාබස් කරන්නට ය. ඒ අතරිනුදු මාත් - අර පොත් කාවාත් වැඩිපුර ම කතා කළේ ළඟක දී කියැවූ පොත් ගැන ය. ට්වයිලයිට් ගැන කතන්දරය ඇදුණේ උසස්පෙළ ඔන්න මෙන්න ළං ව තිබූ එවන් මොහොතක ය. ඒ වන විට මගේ මිතුරිය අලුතින් ම කියවමින් උන්නේ ඒ පොත යි. එදා පූරුවේ පිනක් පළ දී ඉංග්‍රීසි ගුරුතුමිය නොපැමිණි හෙයින් පුරා කාලච්ඡේද දෙකක් පුරා අපේ මිතුරිය නවකතාවේ සහ චිත්‍රපටයේ ඇති වෙනස්කම් ගැනත්, සමානතා ගැනත්, චිත්‍රපටයට වඩා අප නවකතාවට කොතෙක් පෙම් බඳිනු ඇත්ද යන්නත් පිළිබඳ ව අප අට දෙනා වට කොට ගෙන දීර්ඝ දේශනයක් පැවැත්වූවා ය. 

උසස්පෙළ විභාගය නිමවන තුරු ඇඟිලි ගනිමින් හුන් මම උසස්පෙළ නිමා වී එළැඹුණු ඊළඟ ඉරිදා දිනයෙහි ම හුදී ජනයාගේ අතමිටෙහි යහපත උදෙසා පිහිටුවා ඇති සරසවි වෙයාර්හවුස් ආයතනයට ගොස් අඩු මිළට ට්වයිලයිට් - නිව්මූන් සහ එක්ලිප්ස් තුන ම මිළ දී ගත්තෙමි. අපේ පුංචිඅම්මා කියන පරිදි මා සාමාන්‍ය පෙළ විභාග ප්‍රතිඵල පිට වූ දිනයේවත් එපමණ සතුටින් හිටියේ නැත. මා වැම්පයරයෙකුට පෙම් බඳින්නට පටන් ගත්තේ එදා රාත්‍රියේ සිට ය. නවකතාවේ පිටු අතරින් මැවුණු එඩ්වර්ඩ් කලන් එපමණට අපූරු තරුණයෙකු විය. පොත කියවන අතර හමු වන හද බැදි තැන් මගේ මිතුරියට කෙටි පණිවිඩයක සටහන් කොට යැවීමි. ඇය පමණට ම මා ද එඩ්වර්ඩ්ට ආදරය කරන්නට පටන් ගන්නා වග ඉව වැටුණු පසු ඈ මට මෙවන් කෙටි පණිඩිඩයක් එවා තිබිණ.

I am fortunate to have you as a book buddy. You are a great friend. And you are my sister.

But, Edward is mine..!! 




මෙබඳු ම ඥාති සොහොයුරියක් ද මට සිටියි. චිත්‍රපටයෙන් දකින එඩ්වර්ඩ්ට ආදරය කරන්නවුන් අප දෙදෙනාගේ සාමූහික ප්‍රේමයට අකුල් හෙලන්නට එන කල ඔවුන්ට ඈත් මාත් කියන කතන්දරයක් තිබේ.

කවුරුත් අප්සට් ගහන්න ඕනි නෑ. අපි ආදරේ කරන්නෙ ඔය ෆිල්ම් එකේ ඉන්න හැලපයාට නෙමේ. පොතේ ඉන්න එඩ්වර්ඩ් කලන්ට..!! 

රොබට් පැටින්සන් තරම් හොඳින් වෙන කෙනෙකුට එඩ්වර්ගේ චරිතය රඟපාන්නට නොහැකි විය හැකි ය. ඊට ගැළපෙන ම කෙනා ද ඔහු විය හැකි ය. එහෙත් ගැටලුව ඇත්තේ කිසිදු නළුවෙකුට ස්ටෙෆානි හෙවත් ඒ වචනවලින් මැජික් පෙන්වන ලේඛිකාව මවා ඇති එඩ්වර්ඩ් නම් ප්‍රබල චරිතය රඟපාන්නට නොහැකි වීම ය. කොටින් ම එඩ්වර්ඩ් කලන් යනු ලෝකයේ හොඳ ම නළුවාටවත් සාර්ථක ව රඟපාන්නට පුළුවන් ජාතියේ චරිතයක් නොවේ.

මෙහි දී කතාවට ලක් වන්නේ වැම්පයරයෙකුට පෙම් බැඳීම ගැන පමණක් වන නිසා ස්ටෙෆානිගේ කතා කලාව ගැනත් - නිර්මාණ ශක්‍යතාව ගැනත් කතා කරන්නට නොයමි. කතා කරන්නේ හද බැඳි පෙම්බර එඩ්වර්ඩ් ගැන පමණය.

නවකතාවේ කිහිප තැනෙකදී බෙලා කියනා පරිදි ඈ වැනි අවලස්සන තරුණියකට අතිශය කඩවසම් එඩ්වර්ඩ් ගැළපෙන්නේ නැත. එහෙත් සුරූපී වැම්පයර් තරුණියන් කප්පරක් අතුරින් එඩ්වර්ඩ් ආදරය කරන්නට තෝරා ගන්නේ තමා තරම් රූප සම්පත්තියක් නැති - මනුස්ස දුවක් වන බෙලා ව ය. තමා අවට ඇති සුන්දර රුවැත්තියන් හේතුවෙන් ඔහුගේ හදවත සැලෙන්නේ ඇත. වසර ගණනාවක් පුරා ඔහු සිය අතිශය සාමාන්‍ය පෙම්වතිය ම පතා බලා හිඳියි.

එසේ ම මනෝකල්පිත ජීවින් විශේෂයක් වන වැම්පයරයන්ට සාමාන්‍යයෙන්  මනුෂ්‍යයන් සමඟ ගනුදෙනු කරන්නට අපහසු ය. මනුස්ස ජීවින් අසළ හිඳිනා කල ඔවුන් මනුෂ්‍යයන් මරා රුධිරය උරා බොති. මිනිස් රුධිරය දකින කල කොහොමටත් එසේ ය. එහෙත් හදිසි ප්‍රහාරයකට ලක් ව ලේ ගලන සිය මිනිස් පෙම්වතියගේ තුවාලවලට ප්‍රතිකාර කරන්නට තරම් ඔහුට ආත්ම පාලනයක් තිබේ. එම විස්මය දනවන සුළු ආත්ම දමනය සම්බන්ධයෙන් එඩ්වඩ්ට දෙන්නට ඇත්තේ එක ම පිළිතුරක් පමණි. ඒ බෙලා කෙරෙහි වන අසීමිත ආදරයයි.  ඉතින් පින්වතුනි, මනුස්ස වෙසින් හිඳ පෙම්වතියන්ගේ රුහිරු උරා බොන පෙම්වතුන් වෙසෙන කලියුග කාලයක එඩ්වර්ඩ් නමැති වැම්පයරයාට පෙම් බඳින්නට ඒ කාරණාව ම ප්‍රමාණවත් නොවේ ද? 

කොහොමටත් සමස්ත කතා මාලාව පුරා ම එඩ්වර්ඩ් ව නිර්මාණය වී ඇත්තේ අතිශය කාරුණික, අන්‍යයන් හොඳින් වටහා ගන්නා, සුන්දර වතක් සේ ම හදවතක් ද හිමි තුරුණුවෙකු ලෙසිනි. ඔහු නිර්භීත ය. අන්‍යයන් අගයන සුළු ය. කාන්තාවන්ට ගරු කරන්නෙකි. සිය පෙම්වතියට අතිශයින් ආදරය කරන්නෙකි. පොත් කියවන්නෙකි. ශාස්ත්‍රීය සංගීතයට සවන් දෙන්නෙකි. පෙම්වතිය වෙනුවෙන් කවි පබඳින්නෙකි. ශේක්ස්පියර්ගෙන් උද්ධෘත ගෙන කතා කරන්නෙකි. සොබාදහම රස විඳින්නෙකි. අසීමිත ව ඉවසන්නෙකි. කරදරයකදී දුබලයන් ව රකින්නෙකි. සදාකාලික තාරුණ්‍යයේ වෙසෙන්නෙකි.  අමනුෂ්‍යයකු වී ත් මනුෂ්‍යයන්ට වඩා මිනිස්කම් ඇත්තෙකි. 

ඉතාමත් ම සරල ව කියන්නේ නම්, පොත් කියවන යුවතියන්ගේ ෆැන්ටසිය විසින් අපේක්ෂා කරන අන්දමේ ප්‍රේමවන්තයෙකි. 

ඒ ෆැන්ටසියට බෙලා මෙන් ම මමත් අතිශය භයානක ලෙස ආකර්ශණය වෙමින් හිඳිමි. දනිමි. මෙය අවදානම් සහගත ය. එහෙත් අනෙක් අතට ගත් කල ප්‍රේමය කොහොමටත් අවදානම් සහගත කටයුත්තකි.

36 comments:

  1. මමත් මේ චිත්තර පටිය බලා ඇත. වැම්පයර් කථාවලට වැඩි කැමැත්තක් නැති නමුත් මේ කථාව නම් සම්පූර්ණයෙන් බැලුවෙමි.

    ReplyDelete
    Replies
    1. වැම්පයර් කථාවලින් හොඳම කථාව බ්‍රෑම් ස්ටෝකර් ලියපු ඩ්‍රැක්‍යුලා නවකතාව.ඒකෙන් නිර්මාණය කරපු චිත්‍රපටි නම් සෑහෙන්න ප්‍රමාණයක් තියෙනවා.ඒත් අවාසනාවකට වගේ ඒ නවකතාවේ හරය හරියටම අරගෙන හදපු චිත්‍රපටයක් මට තාම අහු වුණේ නෑ.අනිත් ගොඩක් වැම්පයර් කථා මෙලෝ රහකට නෑ.

      Delete
  2. ඒ වගේ චරිතයකට ආදරය නොහිතුනොත් තමා පුදුම:D

    ReplyDelete
    Replies
    1. කසුන් අය්යේ, මේ ඔබේ අවධානය පිණිස යි..!!

      Delete
  3. Replies
    1. වැම්පයර්ස්ලා සුදුළූණු ගාවට වැඩිපුරම බය බළලුන්ට..))

      Delete
    2. එහෙමත් එකක්ද දන්නෙත් අදයි.
      පූසා නම් බය සරසවි මානවිකාවන්ට. දැන් රාජකාරියේ යෙදිලා ඉන්න තැන උන් මගේ ලේ බොන්නේ නැති ටික විතරයි මහපොල එන දාට.

      Delete
    3. ඔය තරම් බයානක නම් උන් වැම්පයර් අංගනාවො වෙන්න ඇති.කෝකටත් පරිස්සමින්.බෙල්ල කඩලා කටවල් දෙක තුනට ලේ උරා බොයි.

      Delete
  4. මට සාමාන්‍යයෙන් වෙන අය අපෝ කිසි වැඩකට නෑ මොන ජරාවක්ද? කියල මූණ ඇඹුල් කරන පොත්වලත් මොකක් හරි අපූරුවක් පේනව.

    ඒත් පුදුම වැඩේ කියන්නෙ මේ Twilight පොත් මාලාව මට ඇල්ලුවෙම නෑනෙ. පළවෙනි පොතේ පිටු තිහක් විතරයි තාම කියෙව්වෙ.. පොත් සෙට් එකම තවම පොත් රාක්කෙ..

    අලේ මල්ලල්ලෑ......කල්ලල්ලෑ......බොල්ලල්ලෑ....:(

    ReplyDelete
    Replies
    1. දෙය්යම්පා ඔහේ මොන මඟුලකට ජීවත් වෙනවද මන්දා රවී මාමෙ ඕක කියවන්නැතුව.. ඇරත් පොත් සෙට් එක ම ළඟ තියාගෙන..!!

      මං එඩ්වඩ්ව එක්කන් එන්න ගිය දවසෙ තිබුණෙ පොත් තුනයි.හතරවෙනි එක ඉවර වෙලා කිව්වා.ඒක ගන්න යන්න වෙලාවක් නැතුව මං කොයි තරම් අප්සැට් එකේ ද ඉන්නෙ.. මේ මනුස්සයා ඒ ටික අත ළග තියාගෙනත් කියවන්නෑ..)))

      Delete
    2. අමාරුවෙන් හරි මුල චැප්ටර්ස් දෙක පන්නගෙන Phenomenon පටන් ගන්නකො.ඊට පස්සෙ බිමින් තියන්න හිතෙන එකක් නෑ..))

      Delete
    3. ඕකේ මැඩම්...ඔහේ ඔච්චරම කියන නිසාත් සහ ඒ වගේම ඔහේගෙ රසඥතාවය ගැන මම හොඳහැටි දන්න නිසාත් ආයම කියවල බලන්නංකො ගෙදර ගියහම...:)

      May be I would get captivated too...Who knows?

      Delete
    4. “And so the lion fell in love with the lamb…" he murmured.

      I looked away, hiding my eyes as I thrilled to the word.

      "What a stupid lamb," I sighed.

      "What a sick, masochistic lion.”

      මෙව්වා කොහොම නොකියවා ඉන්නවද මන්දා..))

      Delete
    5. හරි හරි බං දැං ඔය මදැයි..මම කිව්වනෙ කියවන්නං කියල...:)

      "About three things I was absolutely positive. First, Edward was a vampire. Second, there was a part of him-and I didn’t know how potent that part might be-that thirsted for my blood. And third, I was unconditionally and irrevocably in love with him.”

      Delete
  5. හරිම ලස්සන කතා පෙලක් වගේ මමත් කියවන්න ආසයි. තවත් එකක් ප්‍රේමය නම් හරිම අවදානම් ව්‍යාපාරයක් තමයි.මමත් ඒක පිලිගන්නව.

    ReplyDelete
    Replies
    1. එහෙනං නිකං ඉන්න වෙලාවක කතා පොත ඩවුන්ලෝඩ් කරන් කියවන්නකෝ.මෙන්න,ලින්ක් එක - https://www.youtube.com/watch?v=BLV7JG5I9AA මයෙ හිතේ කියවන්නේ ලේඛිකාවමද කොහෙදෝ..))

      Delete
  6. //මනුස්ස වෙසින් හිඳ පෙම්වතියන්ගේ රුහිරු උරා බොන පෙම්වතුන් වෙසෙන කලියුග කාලයක එඩ්වර්ඩ් නමැති වැම්පයරයාට පෙම් බඳින්නට ඒ කාරණාව ම ප්‍රමාණවත් නොවේ ද?
    100%

    Do not forget to add garlic. For you. But not to the vampire

    ReplyDelete
    Replies
    1. We went into the room,taking the garlic with us.The Professor’s actions were certainly odd and not to be found in any pharmacopoeia that I ever heard of. First he fastened up the windows and latched them securely. Next, taking a handful of the flowers, he rubbed them all over the sashes, as though to ensure that every whiff of air that might get in would be laden with the garlic smell. Then with the wisp he rubbed all over the jamb of the door, above, below, and at each side, and round the fireplace in the same way.

      It all seemed grotesque to me, and presently I said, “Well, Professor, I know you always have a reason for what you do, but this certainly puzzles me. It is well we have no sceptic here, or he would say that you were working some spell to keep out an evil spirit.”

      “Perhaps I am!” He answered quietly.

      (Bram Stoker-Dracula)

      Dracula is a book you should definitely read.It is not just about evil spirit.But a great story about science,myth,love, dedication & human power.

      Delete
  7. මම ඔ්ක කියවල තියනව ළමයා :) ඩ්‍රැනියුලාගෙ අඩවිය කියන පොතත් කියවල තියනෝ. හැබැයි ගොඩක් කල් :)
    හැබැයි පරිවර්තනේ (අනගිරත්න ගෙ)

    ReplyDelete
    Replies
    1. අනගිරත්නගේ පරිවර්තනේ සුපිරියි ඔරිජිනල් එකට වඩා.. ඒකේ කොටස් දෙකක් තිබුණා.පස්සෙ පොත් දෙකම එකතු කරලා අනගිරත්න මහත්තයා සංක්ෂිප්ත පරිවර්තනයක් කරලා තිබුණා.ඒකත් මරු..!!

      Delete
  8. මාත් ඔය ෆිලුම් එකේ මොකක්දෝ එපිසෝඩ් එකක් බලා ඇත.
    එත් මට නම් ඇල්ලුවේ නැත.
    පොත නම් කියවා නැත. සමහර විට ෆිලුම් එකට වඩා පොත පට්ට විය හැක..

    මොනා වුනත් මම නම් අදටත් කැමතිම වැම්පයර් ෆිල්ම් එක "Blade" ය .

    ReplyDelete
    Replies
    1. පොත එක්ක ෆිල්ම් එක සංසන්දනය කරන්න බැහැ විභීෂණ.කොහොමටත් ඉතාම කළාතුරකින් තමා පොතකින් කරන ෆිල්ම් එකක් පොතට වඩා සාර්ථක වෙන්නෙ.එහෙම සාර්ථක වෙච්ච එකක් තමා Railway Children.මේ ලිපිය තනිකරම පොත ගැන-පොතෙන් දකින චරිතය ගැන ලියැවුණු එකක්.

      බ්ලේඩ් බලා නැත.යථා කාලයේ දී බලන්නෙමි.ඔත්තුවට ඉස්කෝතුයි..!

      Delete
  9. වැම්පයර් කතා මම නම් කියෙව්වේ Dracula පමණි. එහි නම් ආදරය කරන්නට දෙයක් නැත. කොහොමටත් මා ආදරය කර නැත. ඒ ගැන වැඩි හැඟීමක් නැත.
    වැම්පයර් කෙනෙක් හෝ හොඳ කෙනෙක් ලැබෙනවා නම් හොඳය. මීයන් අල්ලන්නේ නම් බළලා මැටියෙන් උනත් හැදුනාට කමක් නැත..

    ReplyDelete
    Replies
    1. බ්‍රෑම් ස්ටෝකර්ගේ ඩ්‍රැක්‍යුලා මීට වඩා විශිෂ්ට ගණයේ නිර්මාණයක්.ක්වින්සි මොරිස්,මීනා මරේ,වෑන් හෙල්සිං සහ ජොනතන් හාකර් ආදී විශිෂ්ට ගණයේ චරිත ගණනාවක් මුණ ගැහුණ පොතක් ඒක..

      Delete
  10. කියවන්න ඕන . එත් ඒක කියවද්දී අර කොල්ලගේ සුදුමැලි මූණ මතක් වෙයිද දන්නේ නෑ.

    ReplyDelete
    Replies
    1. කලින් ෆිල්ම් එක බලපු අයට ඒ අවුල පොඩ්ඩක් තියෙනවා.මටත් ඒක වුණා.ඒත් ටිකක් කියවගෙන යනකොට ඒ ගතිය හරි ගියා.මොකද පොතේ ඉන්න එඩ්වර්ඩ් එක්ක රොබට්ව සමපාත කරන්න බෑ කියලා පොතේ මැද හරියට එද්දි දැනෙනවා.

      Delete
  11. ලස්සනට ලියවෙච්ච පොතක් කියවලා ඉවර වෙලා ඒ පොතට අදාළ චිත්‍රපටිය බලද්දී හිතෙන්නෙම පොත චිත්‍රපටියට නැගීමේදී හිතෙන්නෙම ඇයි මේ චිත්‍රපටිය බැලුවේ කියන හැගීම විතරයි. දීර්ග කතාන්දරයක් පැය දෙක තුනක චිත්‍රපටියක් ඇතුලට ඔබද්දී තිරපිටපත ලියන කෙනා රසවින්දනයට වඩා මුල්තැන දෙන්නේ කාල රාමුව ඇතුලට මුළු කතාවම ඔබන්න. එතැනදී එයාල කතාවේ තියන රසය එහෙම්පිටින්ම විනාස කරනවා. එක උදාහරණයක් තමා මහරජ ගැමුණු.

    බලාගෙන වැඩිය ආදරේ කරන්න යන්න එපා කෘන්තක දත් දෙක දික්වෙන්න ඉඩ තිබේ..හෙහ්.

    ReplyDelete
    Replies
    1. මම ෆිල්ම් එක බලලා පොත කියවපු කෙනෙක් නිසා චිත්‍රපටිය ගැන මට ඒ හැටි අවුලක් දැනුණෙ නෑ.ඒත් අම්බලංගොඩ කිව්වා වාගෙම බොහෝ පොත් චිත්‍රපටිවලට නැගීමෙදි වෙන දේ මේකටත් එහෙම්මම සිද්ධ වෙලා තියෙනවා.පොත කියවලා විඳින රසය කොහොමටත් චිත්‍රපටයකින් ගන්න හරි අපහසුයි.කලිනුත් කිව්වා වගේ එහෙම සාර්ථක වෙච්ච අතළොස්සක් චිත්‍රපටිවලින් එකක් තමා Railway Children.

      මහරජ ගැමුණු ගැන ඔබේ කියැවීමට බෙහෙවින් ම එකඟයි.චිත්‍රපටයක් විදියට වෙනම ඒක සාධනීය නිර්මාණයක් තමා.නමුත් නවකතාවේ අහලකින්වත් චිත්‍රපටය තබන්නට බැහැ.ඒක කියවද්දි මට දැනුණ තවත් කාරණයක් තමා,ජයන්ත චන්ද්‍රසිරි කියන සිනමාකරුවා නිසා අපිට ඉතා විශිෂ්ට ගණයේ නවකතාකරුවෙක් අහිමි වෙලා තියෙනවා කියන එක.

      Delete
  12. මීට කලින් අපේ බ්ලොග් ලමයි දෙන්නෙක් ඕක පරිවර්තනය කරන්න ගත්තා. ඒ බ්ලොග් එක දැන් බලන්න බෑ.. පොඩ්ඩියි බුරායි මතක විදියට

    මට කෝටි තුනහමාරක් දුන්නත් ඕක බලන්නෑ නෑ නෑ නෑමයි

    ReplyDelete
    Replies
    1. අප්පා.. පොඩ්ඩි අක්කලා ඕක පරිවර්තනය කළා නේන්නම්.මටත් දැන් මතක් කළාමයි ඔළුවට ආවේ.ඒත් ඒක ඉවරයක් වෙනකම් කළේ නැද්ද කොහෙදෝ..

      මතක හැටියට ඒ බ්ලොග් එකේ නම,සැඳෑ අඳුර..!!

      Delete
    2. Twilight විතරයිනෙ පරිවර්තනේ කලේ දැරිවියේ.. අනිත් පොත් තුනට අත තියන්ට කම්මැලියි කම්මැලියි වගේ.. අරහෙන් GoT පොත් සෙට් එකේ ඉතුරු පොත් ටිකත් තියෙනවා..

      සැඳෑ අඳුර බ්ලොග් එක වහලා දැම්මා.. දැන් ඉතින් කවුරුවත් ඒක කියවන්නෙ නැතුව ඇතිනෙ..

      ඔය දැරිවි කියවලා තියේද The Twilight Saga: The Official Illustrated Guide කියන පොත.. ස්ටෙෆනි එක්ක කරපු සාකච්ඡා, එයා ඒ චරිත හදපු විදිය, ඒ ඒ චරිතවල පසුබිම එහෙම ඔක්කොම විස්තර මේ පොතේ තියෙනවා.. මම කාලෙකට කලින් ඔය පොත් ඔක්කොම PDF විදියට ඩවුන්ලෝඩ් කලා.. මතක නැහැ කොහෙන්ද කියලා..

      Delete
    3. මේ ඇවිත් තියෙන්නෙ වග කිව යුතු පුද්ගලයෝ.. ඔය බලමුකෝ ඉතින් කම්මැලිකම..!! කම්මැලිකම නැතුව ඒක පරිවර්තනය කළා නම් කොච්චර අගේද..

      පොඩ්ඩි අක්කාගෙත් බ්ලොග් එක කාලෙකින් අප්ඩේට් වෙනවා දැක්කෙ නෑ.සැඳෑ අඳුර තිබුණා නම් අපි කියවනවා නොවැ.සිහසුනට තරඟ වැද හරි ආයෙ පාරක් අලු ගසා දාලා පටන් ගත්තා නම් ඉවරනෙ..))

      Illustrated Guide එක නම් මේ දැරිවි කියවලා නෑ.ගූගල් දෙය්යාගෙන් ඉල්ලාගන්න පුළුවන්.ඉඩක් ලද වෙලාවක බලන්න ඕනෑ.ඔත්තුවට තුති..

      ආයේ කදිම පරිවර්තනයක් කියවන්න බලන් ඉන්නවා ඔන්න අපි..!!

      Delete
  13. Lovely post nangi. I also saw Edward as a great and lovable character, but my heart didn't have any space for him as it was already in love with Apu & Noah Calhoun. :D

    ReplyDelete
    Replies
    1. coz I have the ability of falling in love with many at the same time,Noah-Edward-Apu-Vinaya-Darcy-Duishen and so many other fictional characters were my former beloveds..!!

      Delete