Saturday, June 18, 2022

පෝළිම!

විසිහත් පැයක් සිරවී
උන් ඒ දිගැති පෝළිම
ගලමින් මිනිස් රිය ගඟ
නොනැවත ගැලූ පෝළිම 


තේ කෝපි හුවමාරුව
මිතුදම් මැවුණු පෝළිම
බොදුනුද කිතුණු හැම දන
එක් වී රැඳුණු පෝළිම

ධනවත් දිළිඳු පුමිතිරි
සීමා බිඳුණු පෝළිම
එක සහෝදර බැම්මක
මනු සිත් බැඳුණු පෝළිම

අයුක්තිය හිස ඔසවත
යුක්තිය තැනූ පෝළිම
වරදට රැවූ ගෙරවූ
හරි මග සෙවූ පෝළිම

එකම අඳුරක් දරමින්
එකට එක් වූ පෝළිම
අඳුර මඩිමින් එළියක්
සොයාගත් ඒ පෝළිම!

No comments:

Post a Comment